Рөстәм Миңнеханов: “Татарстанның халыкны социаль яклау системасы хакимият органнары эшендә һәрвакыт өстенлекле булыр дип ышанам”

Соңгы елларда Татарстанда халыкка социаль хезмәт күрсәтү һәм социаль яклау өлкәсендә күләмле эш башкарылды, һәм киләчәктә дә күп эш эшләнәчәк. Бүген бу хакта В. И. Качалов исемендәге Казан дәүләт Зур рус драма академик театрында, һөнәри бәйрәмнәре уңаеннан, Социаль хезмәткәрләр форумында Татарстан Президенты вазифаларын вакытлыча башкаручы Рөстәм Миңнеханов билгеләп узды. Бәйрәм чарасында, шулай ук, ТР Дәүләт Советы Рәисе Фәрит Мөхәммәтшин, ТР Президентының социаль мәсьәләләр буенча ярдәмчесе Ләйлә Фазлыева, министрлык һәм ведомство җитәкчеләре, тармак хезмәткәрләре катнашты.

Тантана кысаларында, фойеда сәламәтлек мөмкинлекләре чикле булган балалар, социаль приютларда тәрбияләнүчеләр, өлкән яшьтәге затларның (тыл хезмәтчәннәре, ветераннар) рәсемнәреннән торган күргәзмә җәелдерелгән иде.

Тантаналы прологтан соң, сәхнәгә Рөстәм Миңнеханов күтәрелде. Ул халыкны социаль яклау өлкәсендә эшләүче хезмәткәрләрне һөнәри бәйрәм белән котлап: “Хезмәтегез катлаулы, сезнең ярдәмегезгә республикада 500 меңнән артык кеше мохтаҗ. Киләчәктә дә бергәләп эшләргә насыйп булсын!” – дигән теләктә калды һәм социаль өлкә хезмәткәрләренә башкарган эшләре өчен тирән рәхмәтен җиткерде.

Р. Миңнеханов Татарстан күләмендә 130 дан артык учреждениедә 9 меңнән артык кеше эшләвен билгеләп үтте. “Бүген халыкка социаль хезмәт күрсәтү системасы яхшы эшли. Соңгы елларда республикада күп кенә программалар гамәлгә ашырылып килә, яңа технологияләр кулланыла, матди-техник база ныгытылды. Шулай да, безнең алда әле тагын да зуррак бурычлар тора, чөнки кеше яхшы булган саен, һаман яхшыны таләп итә. Киләчәктә тагын да яңа технологияләрне гамәлгә кертү мөһим, чөнки авыр тормыш вәзгыятенә юлыккан халык сезнең ярдәмгә мохтаҗ”, - дип ассызыклады ТР лидеры.

Ул тагы бер кат бу һөнәр ияләренең эшенең катлаулылыгын билгеләп үтеп, аларның һәрвакыт рәхмәт сүзләре генә дә ишетмәвен шәрехләп үтте. “Матди-техник база торышы да, финанслау күләме дә булган параметрларга, өметләнгәнгә генә тәңгәл дә килеп бетмидер. Шулай да, соңгы елларда күләмле эш башкарылды, һәм киләчәктә дә күп эш эшләнәчәк, - дип, Р. Миңнеханов социаль өлкәдә эшләүчеләрнең шушы һөнәргә җаны белән тартылуын, бу тармакта эшләү һәркемнең дә кулыннан килмәвен ассызыклап үтте. – Сезгә башкарган бурычларыгыз өчен ихлас күңелемнән рәхмәтлемен”.

Татарстан лидеры хакимиятнең һәммә кешегә дә бертөрле мөнәсәбәттә булырга тиешлегенә, әмма катлаулы тормыш хәленә дучар булган затларга, балаларга аеруча кайгыртучанлы мөнәсәбәт булырга тиешлегенә басым ясады. Рөстәм Миңнеханов авыр хәлгә калганнарны тулы канлы тормышка кайтару, аларга ярдәм итү бурычын нәкъ менә шушы тармак хезмәткәрләре үтәвен билгеләп узды.

“Татарстанның халыкны социаль яклау системасы хакимият органнары эшендә һәрвакыт өстенлекле булыр дип ышанам. Алга таба да иң заманча технологияләрне эшкә җигәчәкбез, шушы бурычларны хәл итәргә сәләтле хезмәткәрләрне әзерләячәкбез”, - дип белдерде Рөстәм Миңнеханов.

Алга таба дәүләт бүләкләре тапшырылды. Хезмәт алдынгыларына “ТР атказанган халыкны социаль яклау хезмәткәре” мактаулы исемнәре бирелде, кайберәүләргә ТР Президенты Рәхмәте игълан ителде. Шулай ук, тантана барышында “Татарстан Республикасының иң яхшы социаль хезмәт күрсәтү хезмәткәре” республикакүләм конкурсына йомгак ясалды. Социаль эшчәнлек буенча иң яхшы белгечләр, социаль педагоглар, тәрбиячеләр, психологлар, шәфкать туташлары, инвалидларны тернкәләндерү буенча белгечләр үзләренә тәтегән бүләкләрен кабул итеп алды. Акылы зәгыйфь балалар өчен Югары Отар балалар йорт-интернаты директоры Имаметдин Гәрәев II дәрәҗә “Ватан каршындагы казанышлары өчен” орден медале белән бүләкләнде.